Aymara
Caranavimpin Warisatampin nuwasïwinaka
Pä amtkay luräwinakaw jach’a yatiqañ utan waynanakan p’iqinakapankaski.
Planta procesadora de cítricos ukax Caranavi markanx wila wartäwimp jikxatatawa
14 uru llamayu phaxsit 2010 maranxa, nayax cuarto de secundaria ukankayätwa, provincia Caranavi (La Paz) uksan jakasirinakax Gobiernorux planta procesadora de cítricos lurayañap mayipxäna, maysatx instituto ISTAIC ukax yaqha jach’a yatiqañ utanakan estatus uka uñjapxañap mayipxarakïna.
Ukat jan kuna jaysaw utjatapatx sartasiwinakaw utjawayi, ukakipkarakiw thakhi jark’antäwinakas utjawayi. Ukat mä jayp’ux La Paz markat palla pallanakax purintanisin thakhi jark’antaw aptxäna. 13 uru llamayu phaxsit niya 17.00 pacharux Turco Kala markaruw palla pallanakax thakhi jist’antat aptir purintapxarakïna, ukatx jan walt’äwinakaw utjawayxi, instituto ISTAIC uksankir mayni yatiqiriw jiwat uñjasïna. Caranavi markankirinakax uka arum pachaw tantacht’asipxäna.
Qhipurux 7.00 pacharux palla pallanakax Yara chakaruw sarawayapxi. Ukürux waljaniruw palla pallanakax katuntawayapxäna. Gases lacrimógenos ukanakampiw jacharayäna, ukatx mayni yatiqir masijaw illapt’at jiwawayi. Nayax jupar jiwirx uñjtwa.
Ukat qhiparux provincia de Caranavi ukax planta procesadora de cítricos ukx jikxatawayiwa. Armando Condori Plata, Agronomía, UNIBOL A-TK jach’a yatiqañ utan yatiqiriwa
Warisata markan wila wartäwi
Provincia Omasuyos, Warisata markan markachirinakax 2003 maranx mä wila wartäwin jikxatasiwayapxäna. Jupanakax thakhi jark’antäwin jikatasipxäna, Ejercito palla pallanakax Sorata markat jutapxatayna. 15:00 jayp’u pachat 21:00 arumkamaw uka ch’axwthaptäwix utjawayäna. Markachirinakax thakhi jark’antasaw uka palla pallanakar jan pasayaniñ munapkänti, ukatx palla pallanakax uksat aksat markachirinakarux illapt’apxarakïna. Helicopteros ukanakax aliqapuniw muyuxatarakïna, uka patatpach gases lacrimógenos ukanakamp jaqxatanïn utanakaru, yatiqañ utanakaruw jan walt’awayäna. Kimsa jiwataw utjawayäna, maynix Marlene jisk’a imill wawa, maynirakiw Normal uksan yatiqiri, ukharux Juan Cosme pachpan jakasir jilata, jupanakaw jiwat jikxatasipxäna, ukampirus walja usuchjatanakaw utjarakïna. Janipuniw armaskti. Baneza Rojas Rojas, Ingeniería de Textil, UNIBOL ”ATK” jach’a yatiqañ utan yatiqiriwa.
