Lunes, 02 Marzo 2015 13:04

Jach’a yatiqañ utan aymara arut yatintäwi

Escrito por

Aymara

Jach’a yatiqañ utan aymara arut yatintäwi

Cuyahuani markax quta thiyan ukhamarak Batallas, Huarina marka jak'an jikxatasi. Ukanw 650 wayn tawaqux agronomía, ingeniería de alimentos, ingeniería textil ukat  veterinaria zootecnia uka thakhinakan yatintasipki. Jupanakax jakäwinakapxat ukhamarakiw pachpa Jach'a yatiqañ utats qillqt'apxi, taqi uka qillqäwinakax Jaqi Aru ukat La Publica ukatuqinaw uñt'ayasini.

La Pública, Jaqi Aru

Aymara Tupak Katari jach’a yatiqañ utatx janiw aliq ukhamak tukuyañakiti, jan ukasti (titulo) ukanipuniw tukuyañapa. Janiw khitis jan (tesis) uñt’ayasax jach’a yatiqañ utat sarkaspati, ukhamaw uka jach’a yatiqañ utan thakhipaxa.

Agronomía, ingeniería de alimentos, ingeniería de textil ukat ingeniería de veterinaria uksat 650 yatiqirix ingenieros ukham tukt’ayxañatakix kimsaqallqur tirsunkasinw yatxatäwimp qalltxapxañapäk ukxatx yatxapxi.

Uka yatxataw luratanakapax aymar arun qillqatkamakiñapawa. Kawkïrinakati askïk ukanakax pachpa Instituto de Investigaciones uksan uñtayatawa, taqpach (tesis) luratanakax (digital) ukanw Ministerio de Educación ukar apayata.

Unibol jach’a yatiqañ utax wali uñt’atawa, DS 29664 uka jakhump 2 uru llumpaqa phaxsit utt’ayatawa. Cuyahuani markan Titiqaqa quta thiyan Batallas ukat Huarina marka jak’an jikxatsi. Altu markat sarañatakix Achacachir sarir k’añaskunakataw saraña, pasajix 7 bs. yaqhip munañan tata q’iwirinakax 10 bs. ukha mayipxi.

Jach’a yatiqañ utax quqanakan muyunt’atawa, ukakipkarakiw ikiñ utanakax quqanakan muytata, 2015 mara qalltanx yatiqañ utanak luräwinkasipkiwa. Akat maranakarux jach’aptxaniwa, ukrakwa yatiqir wayn tawaqunakax suyt’asipki, jupanakax janiw yatiqirik sarapkiti jan ukasti uka pachpanw qhipartapxi, siman tukuyakiw markanakapar kutt’awayxapxi.

Yatiqirinakax Estado boliviano uksat yanapt’atawa. Kunapachati mantañatak yant’äwinak katuyasax atipjapki ukhax jupanakax manq’asa, ikiñutasa churatapxiwa, ukat titulación ukarus yanapt’ata ukhamaw yatintapxi.

Ukham yanapt’atak ukatx walja wayn tawaqunakaw may may ayllunkata, markanakat katuqayasir purt’apxi. Uksanx aymar arut arst’asiriñanakapaw mayita, ukhamipansti La Paz, Oruro, Potosi ukat norte de La Paz Yungas uksankir wayn tawaqunakaw uksan yatintasipki, ukampirus Beni uksatx yatiqirinakax utjarakiwa, jupanakax aymara aru yatintañanx ch’am tukt’apxi.

Nayïr (titulados) ukanakax utxiwa, yaqhip yatxatatanakax pachpa Unibol uksanw yaticht’asipki, yaqhanakasti markanakaparuw irnaqir kutt’awayxapxi. Jach’a yatiqañ utan amtapax markanakap pachpan ukhamarak jach’a yatiqañ uta pachpan yatxatatanakax irnaqt’xapxañanakapawa.

Yatiqirinakan sarnaqäwinakapax taqituqinw ukham utji: yaqhipankax pisin jakasirinaka ukhamawa, ukatwa uka jach’a yatiqañ utar yatintañatak purt’awayapxi. (Admisión) yant’äwinx 260 ukhatx 11 yatiqirikiw atipjawayapxi, maysatx (preuniversitario) ukanx 80% ukharakiw yant’äwinx askinjam katuyapxi. Ukhamwa yatiqir wayn tawaqunakax arunakapamp arst’awayapxi, Jaqi Aru La Publica uksatw mä amtax utji, wayn tawaqunakan sarnaqäwinakapxat qillqt’apxañanakapataki.

Yatiqirinakax arunipxiwa janiw khitis jupanakar amukt’ayapkiti. Taqi ukanakwa jupanakax qillqt’apxi, ukwa La Publica ukat Jaqi aru uksankirinakax ullart’irinakar uñt’ayasipki.

Repercusión:

http://es.globalvoicesonline.org/2015/04/18/los-estudiantes-se-conectan-con-sus-raices-comunitarias-en-la-universidad-indigena-boliviana-aymara/

Visto 3837 veces Modificado por última vez en Martes, 21 Abril 2015 12:57
La Pública

La Pública es un proyecto que busca crear y gestionar espacios para el ejercicio ciudadano a través de redes sociales y fuera de ellas, articulando para ello el periodismo digital y el activismo.

fb htw hyt h

lp15

 

La Paz - 71597592
Cochabamba - 71786333
Santa Cruz - 71528022

 

cc