Palos Blancos thakhix wila masijkamaw puriyitu
Uraqpachan uka thakhix wali chiji utjayirit uñt’atawa, patak patak chijin jiwataw utjawayi, taqi ukanak jan amtasiñatakix thakhin ikiwayxirïtwa. Qhipkutix jawirat umax walipuniw jilarawayxi, ukhamipanx 200 k’añaskuw thakhin sayantat jikxatasxäna. Saririnakax (pasajeros) jan manq’ataw jikxatasipxayäta, ukampirus janirakiw kuna yanap mayiñatakis jawsañatakis señal ukas jawsañatak utjkänti.
Celia Riveros Perca, Ingeniería de Alimentos, Unibol “ATK” jach’a yatiqañ utan yatiqiriwa Nayax departamento de La Paz, provincia Sud Yungas, municipio Palos Blancos uksankirïtwa. Jichhax Cuyahuani markan jach’a yatiqañ utan yatiqaskta. Nawirarana ukat machaq maran wila masijamp qamarañatakix wali k’uchikiw kutt’awayta, ukampirus thakhi sarañ asxart’ayasirakirïta. Jilanakajaru, tatajaru, ukat mamajar jan uñjasax janiw jakkiristi, ukat makajar uñjirix uka k’ullk’u thakhinjam q’iwt’as q’iwt’as sarta. Yungas thakhix wali warank warankuwa, ukhamipanx jallu qallta phaxsit anata phaxsikamax thakhix wali asxarkayapuniwa. Qullutx qarqanaka, jach’a qalanaka ukhamaw jithiqtani. Nayax uka phaxsinakanpunw sarta ukhamarak kutt’anta. Uraqpachan uka thakhix wali chiji utjayirit uñt’atawa, patak patak chijin jiwataw utjawayi, taqi ukanak jan amtasiñatakix thakhin ikiwayxirïtwa. Qhipkutix jawirat umax walipuniw jilarawayxi, ukhamipanx 200 k’añaskuw thakhin sayantat jikxatasxäna. Saririnakax (pasajeros) jan manq’ataw jikxatasipxayäta, ukampirus janirakiw kuna yanap mayiñatakis jawsañatakis señal ukas jawsañatak utjkänti. Mä qhipurux ukanakax turkxapunchinïy saw suyt’askta. Nayax maran maykutikiw sarta, ukampirus yaqhipanakax sapürunjamaw irnaqaw laykux sarapxi.Aymara
